काठमाडौँ । मानव सेवा फाउन्डेसन नेपालले आइतबार काठमाडौँमा बृहत साइकल र्याली गरेको छ । ऐतिहासिक पशुपति कोटिहोम महायज्ञको पूर्व सन्ध्यामा फाउन्डेसनले र्यालीको आयोजना गरेको हो ।
र्याली पशुपति क्षेत्रबाट सुरु भइ चक्रपथ परिक्रमा गरेको थियो । करिब २७ किलोमिटरको उक्त र्यालीमा प्रतिनिधीसभा सदस्य शेर बहादुर कुँवरको पनि उपस्थिति रहेको थियो भने गायक कमल खत्री तथा अन्य प्रतिष्ठित व्यक्तिहरुको पनि सहभागिता थियो । र्यालीमा ३०० बढी साइकल यात्रीहरुले सहभागीता जनाएका थिए । पशुपतिमा भेला भएर चाबहिल हुँदै चक्रपथ परिक्रमा गरि कलंकी, कोटेश्वर, एयर्पोट हुँदै पशुपतिमै पुगेर र्याली सम्पन्न भएको थियो ।
महायज्ञ उपसमितिका संयोजक लेखराज ढकालका अनुसार इतिहासमै पहिलो पटक हुँदै गरेको ऐतिहासिक कोटिहोममा काठमाडौँबासिलाई निमन्त्रणा दिनका लागि साइकल र्याली गरिएको हो । मानव सेवा फाउन्डेसनलगायत विभिन्न संघ–संस्थाको आयोजनामा साउन महिनाभर पशुपति क्षेत्र परिसरमा कोटिहोम महायज्ञ आयोजना हुँदैछ ।
‘ऐतिहासिक श्री पशुपति कोटिहोम एवं १०८ श्रीमद्भागवत विश्व कल्याण मासिक ज्ञान महायज्ञ’ नाम दिइएको उक्त विराट महायज्ञ साउन १ देखि ३२ गतेसम्म सञ्चालन हुँदैछ । ललितपुरको बाँडेगाउँमा सञ्चालित मामाघर आश्रम र भक्तपुरको चाँगुनारायणमा सञ्चालित छोरीको घर ज्येष्ठ नागरिक आश्रमको भवन निर्माण सहयोगार्थ महायज्ञ आयोजना हुन गइरहेको हो । कोटिहोमकै अवसरमा भोली ३१ गते विशाल शोभा कलश यात्रा हुँदैछ । कलश यात्राका लागि देश तथा विदेशबाट समेत हजारौँ हिन्दू धमाबलम्बिहरु उपत्यका आइसकेको र आउने क्रम अझै रहेको महायज्ञ उपसमितिका संयोजक ढकालले बताए ।
