सुडानमा बाँध भत्किँदा ६० जनाको मृत्यु, सयौं बेपत्ता

पूर्वी सुडानमा रहेको अरबात बाँध भत्किँदा ६० जना भन्द्या बढीको मृत्यु भएको छ । सयौँ बेपत्ता भएका सुडान सुरक्षा बलले जनाएको छ । रेड सी स्टेटको वाटर कर्पोरेशनका प्रमुख ओमेर इस्सा ताहिरले बाँध फुट्दा राज्यको राजधानी पोर्ट सुडान नजिकका गाउँहरू बगाएको बताउनु भयो । उहाँले बाँध क्षेत्र र वरपरका गाउँहरूमा तत्काल हस्तक्षेप गर्नुपर्नेमा जोड दिनुभयो । बन्दरगाह सुडानबाट करिव २० किलोमिटर उत्तरमा अवस्थित यस बाँधमा २५ मिलियन क्यूबिक मिटर क्षमता भएको जलाशय थियो । यो शहरको लागि प्रमुख पानीको स्रोत थियो । संयुक्त राष्ट्रसंघले जूनदेखि भारी वर्षा र बाढीले युद्धग्रस्त देशका करिव ३ लाख १७ हजार मानिसहरूलाई असर गरेको रिपोर्ट गरेको छ । सुडानी मौसम विज्ञान प्राधिकरणले सेप्टेम्बरको मध्यसम्म वर्षा र बाढी जारी रहने अनुमान गरेको छ ।
सिन्ह्वाको सहयोगमा न्युज एजेन्सी नेपालले तयार पारेको समाचार सामग्री ।