उपाध्यक्ष पौडेललाई बिना शर्त रिहा गर्न माग गर्दै एमालेले भन्यो–सरकार एमाले केन्द्रित भइ पूर्वाग्रही बनिरहेको छ, यो ठिक भएन

प्रतिपक्ष दल नेकपा एमालेले सरकार एमाले केन्द्रित भइ पूर्वाग्रहपूर्ण ढंगले प्रश्तुत भएको निष्कर्ष निकालेको छ ।
मंगलवार साँझ पार्टी अध्यक्ष केपी शर्मा ओलीको निवास गुण्डुमा बसेको बैठकले यस्तो निष्कर्ष निकालेको पार्टीका उपमहासचिव लेखराज भट्टले बताउनुभएको हो । उहाँकाअनुसार सरकार एमालेलाई केन्द्रित गरेर पूर्वाग्रहपूर्ण ढंगले प्रश्ततु भएको छ । सरकारका यि गतिविधिहरु उचित होइनन् । उहाँले पार्टीका उपाध्यक्ष विष्णुप्रसाद पौडेलको गिरफ्तारी गैरकानूनी र प्रतिशोधमूलक एवं पूर्वाग्रही भएको एमालेले निष्कर्ष निकालेको बताउनु भयो । पार्टीको एक कार्यक्रममा सुर्खेतमा रहनुभएका पौडेललाई कार्यक्रमस्थलबाटै पक्राउ गरी सार्वजनिक सवारीमार्फत काठमाडौं ल्याइएको थियो । जुन निकायको नामबाट गिरफ्तारी गरिएको हो, त्यसको कार्यक्षेत्रभित्र यो विषय नपर्ने पनि एमालेले बताएको छ । यस प्रकाकार सरकारका गतिविधि तत्काल बन्द गर्न र पार्टी उपाध्यक्ष पौडेललाई बिना शर्त रिहाइ गर्न माग गरेको छ ।
उहाँले भन्नुभयो, ‘आजको बैठकको मुख्य एजेण्डा एउटै थियो । हाम्रो पार्टीका उपाध्यक्ष विष्णुप्रसाद पौडेलको गिरफ्तारीप्रति पार्टीको गम्भीर ध्यानाकर्षण भएको छ । पार्टीको निष्कर्षमा यो गिरफ्तारी गैरकानूनी, प्रतिशोधमूलक र पूर्वाग्रही छ । उहाँ काठमाडौँ आउने टिकट लिएर काठमाडौंमै आउँदै हुनुहुन्थ्यो । तर हिजो नै सुर्खेतमा उहाँलाई गिरफ्तार गरिएको छ । जुन निकायको नामबाट गिरफ्तारी गरिएको हो, त्यसको कार्यक्षेत्रभित्र यो विषय पर्दैन भन्ने हाम्रो ठहर छ । त्यसैले यो प्रक्रिया कानूनसम्मत छैन । आज अदालतले अनुसन्धानका लागि सात दिनको म्याद थप गर्दै हिरासतमा राख्ने आदेश दिएको छ । यो निर्णय अपेक्षित थिएन र न्यायोचित पनि भएन भन्ने हाम्रो धारणा छ । त्यसकारण पार्टीको यस विषयमा गम्भीर ध्यानाकर्षण भएको छ । यस्ता प्रकारका गतिविधिहरू तुरुन्त बन्द गरिनुपर्छ र उपाध्यक्ष विष्णुप्रसाद पौडेलको बिना शर्त रिहाइ हुनुपर्छ भन्ने पार्टीको स्पष्ट माग छ । पार्टीले यस विषयलाई अत्यन्त गम्भीरतापूर्वक लिएको छ । हालका लागि सचिवालयको एउटै माग छ–उहाँको बिना शर्त रिहाइ हुनुपर्छ । यो गिरफ्तारी प्रतिशोधमूलक, पूर्वाग्रही र गैरकानूनी रहेको पार्टीको निष्कर्ष छ । आजको बैठकले यस विषयमा गम्भीर ध्यानाकर्षण गराएको छ । आगामी दिनमा कानूनी लडाइँ लड्ने विषय आफ्नो ठाउँमा छँदैछ । त्यसका अतिरिक्त आवश्यक कदमहरूबारे पनि पार्टीले समयानुकूल निर्णय लिनेछ । आजको बैठकको निष्कर्ष के हो भने, एमालेलाई केन्द्रित गरेर पूर्वाग्रहपूर्ण ढंगले गरिएका यस्ता गतिविधिहरू उचित होइनन् ।’
पार्टीले कानूनी लडाइँ लड्ने र अतिरिक्त आवश्यक कदमहरूबारे पनि पार्टीले समयानुकूल निर्णय गने बताएको छ । –न्युज एजेन्सी नेपाल