काठमाडौंको भृकुटीमण्डपस्थित प्रदर्शनी हलमा गत बिहीवारदेखि ‘साउथ एसिया ट्रेड फेयर’ (दक्षिण एशियाली व्यापार मेला) जारी छ । दक्षिण एशियाली राष्ट्रहरूका विभिन्न उत्पादन तथा सेवाको प्रवद्र्धन गर्ने, बजार सम्भाव्यताको अध्ययन गर्ने र क्रेता–विक्रेताबीच सहकार्य विस्तार गर्ने मुख्य उद्देश्यका साथ यो मेला आयोजना गरिएको हो । मेलामा दक्षिण एशियाली मुलुकका उद्योग, व्यापार तथा सेवासम्बन्धी विविध उत्पादनहरू प्रदर्शनीका लागि राखिएका छन् । आयोजककाअनुसार प्रदर्शनीमा कपडा तथा रेडिमेड सामग्री, सौन्दर्य सामग्री, हस्तकलाका वस्तु, सवारीसाधन तथा पार्टपुर्जा, फर्निचर, कृषि उत्पादन, सूचना प्रविधि र घरेलु उपकरणलगायतका सामग्रीहरू उपलब्ध छन् । प्रदर्शनीका साथै व्यापारिक भेटघाट (बिजनेस मिट), फुड फेस्टिभल, रक्तदान कार्यक्रम तथा विभिन्न मनोरञ्जनात्मक गतिविधिहरू समेत सञ्चालन गरिने जानकारी दिइएको छ । मेलाले नेपालमा लगानी तथा व्यापार विस्तारका नयाँ सम्भावनाहरू सिर्जना गर्ने विश्वास लिइएको छ । मुलुकमा लामो समयदेखि सुस्त रहेको व्यापारिक वातावरण र लगानीगत अनिश्चिततालाई तोड्दै निजी क्षेत्रलाई सक्रिय बनाउन यो मेलाले महत्वपूर्ण भूमिका खेल्ने अपेक्षा गरिएको छ । वैशाख २८ गतेसम्म सञ्चालन हुने यस मेलामा आयोजक राष्ट्र नेपालसहित भारत, बङ्गलादेश, भूटान, पाकिस्तान, अफगानिस्तान, श्रीलङ्का र माल्दिभ्सका उद्यमी तथा व्यवसायीहरूको सहभागिता रहेको छ ।
तस्बिरहरुः अनुप प्रधान/न्युज एजेन्सी नेपाल
