नेपाली कम्युनिष्ट पार्टीका सहसंयोजक एवं पूर्वप्रधानमन्त्री माधवकुमार नेपालले सरकारलाई तमासा देखाउन छाडेर जनताका समस्याप्रति संवेदनशील र जिम्मेवार हुन आग्रह गर्नुभएको छ ।
प्रदीप नेपाल स्मृति पत्रकारिता पुरस्कार वितरण समारोहलाई सम्बोधन गर्दै पूर्वप्रधानमन्त्री नेपालले मुलुकमा बढ्दै गएको आत्महत्याको प्रवृत्ति र नागरिकले भोगिरहेका पीडाप्रति सरकार गम्भीर हुनुपर्ने बताउनुभएको हो । उहाँले सरकारले सञ्चार गृह र राजनीतिक दलका नेताहरूको घर अगाडि गाडी तेस्र्याएर शक्ति प्रदर्शन गर्ने जस्ता अपरिपक्व कार्य गर्न नहुने टिप्पणी गर्नुभयो । सरकारको कार्यशैलीप्रति प्रश्न उठाउँदै नेता नेपालले नयाँ सरकारलाई काम गर्न र सिक्नका लागि १०० दिनको समय दिइएको तर बिहानीले दिनको सङ्केत गर्छ भनेझैँ सरकारको शुरुवाती लक्षणहरू उत्साहजनक नदेखिएको स्पष्ट पार्नुभयो । आफूहरू अहिले सरकार ढाल्ने खेलमा नरहेको प्रष्ट पार्दै उहाँले प्रतिपक्षका रूपमा सकारात्मक भुमिका निर्वाह गर्ने प्रतिवद्धता जनाउनु भयो । यद्यपि, उहाँले राष्ट्रिय हित विपरितका कार्य नगर्न सरकारलाई सचेत गराउनु भयो । सहसंयोजक नेपालले भन्नुभयो, ‘आज जनताका पीडा हामीले हरेक दिन सुनिरहेका छौँ । आत्महत्यासम्म पुग्ने निराशाजनक घटनाहरूले हामी सबैलाई गहिरो पीडा दिइरहेका छन् । यस्तो अवस्थामा सरकार संवेदनशील बन्नुपर्छ । तमासा देखाउने काम नगरी जिम्मेवारीपूर्वक शासन सञ्चालन गर्नुपर्छ । सरकार नयाँ भएकाले शुवआती १०० दिनको समय दिइएको हो । तर सिक्ने र सुधार गर्ने संकेत शुरुदेखि नै देखिनुपर्छ । शुरुवाती कामले नै भविष्यको दिशा देखाउँछ । त्यसैले सरकारले आफ्नो कार्यशैलीबाट सही सन्देश दिनुपर्छ । राम्रो काम गर्दा देश र जनताको नै हित हुन्छ। त्यसैले अनुभवबाट सिक्दै सही दिशामा अघि बढ्नुपर्छ । अहिले हाम्रो उद्देश्य सरकार ढाल्ने होइन । न त त्यसतर्फ लागेका छौँ, न अहिले त्यस्तो अवस्था नै छ । हाम्रो भुमिका सकारात्मक र रचनात्मक हुनेछ । तर सरकारसँग हाम्रो आग्रह छ–देशको हितलाई पहिलो प्राथमिकतामा राख्नुस् । विदेशी स्वार्थको पक्षमा नलाग्नुस्, छिमेकी राष्ट्रसँग अनावश्यक तनाव सिर्जना गर्ने काम नगर्नुस्, र गरिब, सुकुम्बासी, विपन्न, महिला, दलित तथा अन्य कमजोर समुदायलाई कुनैपनि प्रकारको पीडा हुने अवस्था आउन नदिनुस् ।’
सुकुम्वासी, आर्थिक रूपमा विपन्न परिवार, महिला तथा दलित समुदायले भोग्नुपरिरहेको सास्तीप्रति चिन्ता व्यक्त गर्दै नेता नेपालले राज्यका तर्फबाट कसैले पनि पीडा सहनु नपर्ने गरी काम गर्न सरकारको ध्यानाकर्षण गराउनु भयो । –न्युज एजेन्सी नेपाल