नेपाल पत्रकार महासंघका पूर्वअध्यक्ष हरिहर विरहीले संवैधानिक सुनिश्चितताका बाबजुद सञ्चार क्षेत्रमा चुनौती कायम रहेको बताउनुभएको छ ।
महासंघले आईतवार ललितपुरमा आयोजना गरेको बदलिँदो परिस्थितिमा प्रेस स्वतन्त्रताः सञ्चार कानून र जिम्मेदवार पत्रकारिता विषयक कार्यक्रममा बोल्दै उहाँले यस्तो बताउनुभएको हो । जस्तोसुकै परिस्थितिमा पनि नेपालको प्रेस जगतले आफ्नो कर्तव्य पूरा गर्न विभिन्न मूल्य चुकाउनुपरेको बताउनु भयो । संविधानले पूर्ण प्रेस स्वतन्त्रता दिइसकेपछि र परिवर्तनको आन्दोलनको नेतृत्व नै प्रेस जगतले गरिसकेको अवस्थामा पनि पत्रकारहरूले आधारभूत आवश्यकता पनि पूरा गर्न नसक्ने स्थिति सिर्जना हुनु दुःखद् भएको बताउनु भयो । राज्यको सूचना लुकाउने प्रवृत्ति र सही सूचनालाई गलत सावित गर्नको निमित्त विभिन्न प्रकारका प्रयत्नहरू गर्ने कोशिस अहिले पनि भइरहेको जिकिर गर्नुभयो ।
उहाँले भन्नुभयो, ‘जस्तोसुकै परिस्थितिमा नेपालको प्रेस जगतले आफ्नो यो कर्तव्य पूरा गर्नको निमित्त विभिन्न प्रकारको मूल्यहरू चुकाइरहेको छ । राजनीतिक कारणले देशमा लोकतन्त्र नभएको कारणले उत्पन्न परिस्थिति यो बेग्लै थियो । तर संविधानले पूर्ण प्रेस स्वतन्त्रता लेखिसकेपछि र परिवर्तनको आन्दोलनको नेतृत्व नै प्रेस जगतले गरिसकेको अवस्थामा पनि पत्रकारहरूले एउटा आधारभूत आवश्यकता पनि पूरा गर्न नसक्ने स्थिति सिर्जना हुनु भनेको एउटा दुःखद् अवस्था हो । त्यो प्रवृत्ति राज्यको प्रवृत्ति सूचना लुकाउने अथवा सही सूचनालाई गलत सावित गर्नको निमित्त विभिन्न प्रकारका प्रयत्नहरू गर्ने कोशिस अहिले पनि कुनै न कुनै रूपमा भइरहेको अनुभूति पत्रकारहरूले पनि र पत्रकारका पाठक, श्रोता र दर्शकहरूले पनि गरिरहेको हुनुपर्छ भन्ने मलाई लाग्दछ । हामीले देखेका छौं, ठूलै भनिने ठूलो र शक्तिशाली भन्ने सञ्चार माध्यमले नै प्रमाणसहित एउटा मन्त्रीको बारेमा लेखेको समाचारलाई त्यस संस्थाका सञ्चालकले खण्डन गरेर माफी माग्नुपर्ने अवस्था यसअघि कहिल्यै नभएको अवस्था अहिले उत्पन्न भएको छ ।’
प्रमाणसहित मन्त्रीको बारेमा लेखेको समाचारलाई संस्थाका सञ्चालकले खण्डन गरेर माफी माग्नुपर्ने अवस्था यसअघि कहिल्यै नभएको पनि बताउनु भयो । –न्युज एजेन्सी नेपाल