भूमि व्यवस्था, सहकारी, संघीय मामिला तथा समान्य प्रशासन मन्त्रालयका सचिव मदन भुजेलले कलेजलाई स्टाफ कलेजलाई ‘सेन्टर अफ एक्सिलेन्स’ का रुपमा विकास गरिने बताउनुभएको छ ।
नेपाल प्रशासनिक प्रशिक्षण प्रतिष्ठान (स्टाफ कलेज) को ४४ औँ स्थापना दिवसमा आईतवार आयोजित समारोहलाई सम्बोधन गर्दै उहाँले यस्तो बताउनुभएको हो । उहाँले कलेजलाई नेतृत्व विकास केन्द्रका रूपमा स्थापित गर्न मन्त्रालय प्रतिवद्ध रहेको बताउनु भयो । सचिव भुजेलले प्रतिष्ठानले निजामती सेवामा पु¥याएको योगदानको प्रशंसा गर्दै स्टाफ कलेजलाई भौतिक पूर्वाधारमा सुदृढ तुल्याउन र काभ्रेमा जग्गा प्राप्तिसहितका विस्तारका कामहरूमा मन्त्रालयले पूर्ण सहयोग गर्ने प्रतिवद्धता जनाउनु भयो । प्रतिष्ठानले हालै प्राप्त गरेको आईएसओ प्रमाणपत्रले संस्थाको गुणस्तर र व्यावसायिकतालाई प्रमाणित गरेको उल्लेख गर्दै उहाँले यसलाई थप आधुनिकीकरण गर्नुपर्ने आवश्यकता औँल्याउनु भयो ।
सचिव भुजेलले भन्नुभयो, ‘म अहिले भूमि व्यवस्था, सहकारी, संघीय मामिला तथा समान्य प्रशासन मन्त्रालयको सचिवको हैसियतले यहाँ उपस्थित भएको छु । यस अवसरमा स्टाफ कलेजको भौतिक पूर्वाधार विकास, विशेषगरी काभ्रेमा जग्गा प्राप्ति तथा पूर्वाधार विस्तारका लागि मन्त्रालयको पूर्ण सहयोग रहने प्रतिवद्धता व्यक्त गर्न चाहन्छु । त्यसैगरी, कलेजको सिकाइ प्रणालीलाई थप आधुनिक बनाउँदै तालिमका साथै अनुसन्धान र परामर्शका क्षेत्रमा समेत यसको भूमिका विस्तार गर्न मन्त्रालय सधैँ साथमा रहनेछ । यस संस्थालाई व्यवस्थापन तथा नेतृत्व विकासको केन्द्रका रूपमा विकास गरी परिवर्तित सन्दर्भअनुसार दक्ष जनशक्ति उत्पादन गर्ने र यसलाई उत्कृष्टताको केन्द्रका रूपमा स्थापित गर्ने कार्यमा मन्त्रालयको निरन्तर सहयोग रहनेछ । यो संस्थाले मात्र तालिम दिने होइन, अनुसन्धान र परामर्श क्षेत्रमा पनि अग्रणी भुमिका खेल्दै अन्य प्रशिक्षण केन्द्रहरूको समेत पथप्रदर्शक बन्नुपर्छ । सरकारी निकाय, विश्वविद्यालय र प्रतिष्ठानबीचको समन्वयलाई अझ बलियो बनाउनुपर्छ ।’
हालै खारेज गरिएको स्थानीय विकास प्रशिक्षण प्रतिष्ठानबाट हुँदै आएको शाखा अधिकृत स्तरको तालिम अब स्टाफ कलेज मातहत ल्याउने विषयमा छलफल भइरहेको जानकारी दिनुभयो । सचिव भुजेलले प्रदेश स्तरमा छुट्टै प्रशिक्षण केन्द्रहरू स्थापना भइसकेको सन्दर्भमा केन्द्रमा दोहोरो प्रकृतिको संस्था आवश्यक नपर्ने तर्क गर्दै यसको व्यवस्थापन स्टाफ कलेजबाटै हुनुपर्ने बताउनु भयो । –न्युज एजेन्सी नेपाल