शुक्रबार सार्वजनिक गरिएको उक्त गीतमा पछिल्लो समयकी लोकप्रिय गायिका अनु चौधरी र गायक हसन राईको सुमधुर स्वर रहेको छ। गीतमा सुनिल राईले संगीत संयोजन (एरेन्ज) गरेका छन्।
नेपाली गीत–संगीतको प्रवर्द्धन, म्युजिक भिडियो उत्पादन तथा वितरणमा सक्रिय लुङ्गटो क्रियसनको आधिकारिक युट्युब च्यानल ‘Lungto Creation’ मार्फत गीतको भिडियो सार्वजनिक गरिएको हो। भिडियोमा कलाकार लक्ष्मी बर्देवा र प्रभातपाल ठकुरीले अभिनय गरेका छन्।
दशैँलाई केन्द्रमा राखेर तयार पारिएको गीतले नेपाली समाजमा चाडपर्वको आगमनसँगै देखिने उत्साह, उमंग र सांस्कृतिक वातावरणलाई संगीतमार्फत प्रस्तुत गर्ने अपेक्षा गरिएको छ। दशैँको समयमा सार्वजनिक हुने गीतहरूले परिवारसँगको भेटघाट, गाउँघरको सम्झना र चाडपर्वको खुसीलाई सांगीतिक रूपमा अभिव्यक्त गर्ने भएकाले यस्ता गीतप्रति श्रोताको विशेष आकर्षण रहने गरेको छ।
गायक हसन राईले यसअघि करिब एक महिनाअघि आफ्नै जिल्लावासी संगीतकार महेश खड्कासँगको सहकार्यमा ‘खोर्सानी खायो मैनाले’ गीत सार्वजनिक गरेका थिए। नेपाली सांगीतिक क्षेत्रमा सक्रिय राईका ‘बुट्टे झोली’, ‘मखमली चोली’, ‘आँखैमा लाउनु पर्दैन’, ‘पैसा कि बैँस’ र ‘यी आँखालाई’ लगायतका दर्जनौँ गीत सार्वजनिक भइसकेका छन्।
गायक राईका अनुसार ‘दशैं आयो’ सार्वजनिक भएसँगै गीतले सामाजिक सञ्जाल तथा विभिन्न डिजिटल संगीत प्लेटफर्ममा चर्चा बटुल्न थालेको छ। दशैँको माहोल सुरु भएसँगै सार्वजनिक भएको यस गीतले चाडपर्व लक्षित गीतहरूको सूचीमा थप आकर्षण ल्याउने अपेक्षा गरिएको छ।