नेपालका ऐतिहासिक तथा कलात्मक सम्पदाहरूको पुनर्निर्माणमा मौलिकता र गुणस्तर कायम गर्न प्रधानमन्त्रीले विशेष चासो देखाउनुभएको छ ।
सम्पदा निर्माणका क्रममा मौलिक कला खस्किएको भन्दै सरोकारवालाले राखेको गुनासो सम्बोधन गर्न प्रधानमन्त्रीले नेपाल हस्तकला महासंघ र नेपाल निर्माण व्यवसायी महासंघका प्रतिनिधिहरूसँग संयुक्त छलफल गर्नुभएको हो । नेपाल हस्तकला महासंघका अध्यक्ष रविन्द्र शाक्यकाअनुसार यसअघि प्रधानमन्त्रीसँगको भेटमा महासंघले पुनर्निर्माणका कार्यहरूमा नेपालको मौलिकपन र उच्च गुणस्तर कायम हुन नसकेको विषयमा ध्यानाकर्षण गराएको थियो । हस्तकला महासंघ एक गैर–नाफामूलक संस्था भएकाले सरकारी ठेक्का प्रक्रियामा प्रत्यक्ष सहभागी हुन नसक्ने प्राविधिक कठिनाइ रहेको जानकारी गराउँदै महासंघले निर्माण व्यवसायीहरूसँगको समन्वयमा काम गर्नसके यसले सकारात्मक नतिजा दिने प्रश्ताव राखेको थियो । हस्तकला महासंघको उक्त प्रश्ताव र गुनासोप्रति प्रधानमन्त्रीले तत्कालै सक्रियता देखाउनुभएको छ । गुनासो राखेको दुई दिनभित्रै प्रधानमन्त्रीले निर्माण व्यवसायी महासंघ र हस्तकला महासंघका पदाधिकारीहरूलाई संयुक्त रूपमा बैठकमा बोलाएर समन्वयात्मक ढंगले अगाडि बढ्न निर्देशन दिनुभएको हो । अध्यक्ष शाक्यले प्रधानमन्त्रीको यस शिघ्र कदमले व्यवसायीहरूमा नयाँ उत्साह र सकारात्मक ऊर्जा थपेको बताउनु भयो । अबका दिनमा दुवै महासंघबीच प्रभावकारी समन्वय भएमा पुराना संरचनाहरूको पुनर्निर्माणमा उच्च गुणस्तर कायम हुने र नेपालको मौलिक कला–संस्कृतिको संरक्षणमा ठूलो योगदान पुग्ने विश्वास व्यक्त गरिएको छ ।
उहाँले भन्नुभयो, ‘अस्ति सम्माननीयज्यूसँगको भेटघाटका क्रममा पुनःसंरचना गर्ने तथा कलात्मक सम्पदा निर्माण गर्ने क्रममा हाम्रो मौलिक कला र पहिचान केही कमजोर हुँदै गएको तथा मौलिकताअनुसार उच्च गुणस्तरका कला सिर्जनामा केही कमी भएको विषयमा हामीले आफ्नो धारणा राखेका थियौँ । यस सन्दर्भमा सम्बन्धित प्रमुख सरोकारवाला पक्षका रूपमा हामी हस्तकला महासंघ आफैँ गैरनाफामूलक संस्था भएकाले ठेक्कापट्टाको प्रक्रियामा प्रत्यक्ष सहभागी हुन नसक्ने अवस्था रहेको उल्लेख गरेका थियौँ । तर निर्माण व्यवसायी संघ–संस्थाहरूले नेपाल सरकारसँग गर्ने ठेक्का प्रक्रियामा हामीसँग सहकार्य र समन्वयात्मक भूमिका निर्वाह गर्न सकेमा यसले सकारात्मक परिणाम ल्याउने र नेपालको कला, संस्कृति संरक्षण तथा मौलिकताको प्रवद्र्धनमा महत्त्वपूर्ण योगदान पुग्ने कुरा सम्माननीयज्यू समक्ष राखेका थियौँ । सोही विषयलाई मध्यनजर गर्दै आज सम्माननीयज्यूले दुई दिनभित्रै निर्माण व्यवसायी महासंघ र हस्तकला महासंघलाई संयुक्त रूपमा सहभागी गराई आगामी दिनमा कसरी समन्वय गरेर उच्च गुणस्तरका संरचना तथा कलात्मक उत्पादन निर्माण गर्न सकिन्छ भन्ने विषयमा छलफलका लागि बैठक आयोजना गर्नुभएको छ । यो पहलले हामीलाई निकै उत्साहित बनाएको छ । सम्बन्धित सरोकारवालालाई यति छिटो एकै ठाउँमा ल्याएर सकारात्मक पहल सुरु गरिनुले हामीमा नयाँ ऊर्जा र विश्वास थपेको छ ।’
यो सहकार्यले सरकारी ठेक्कापट्टाको प्रक्रियागत जटिलतालाई हल गर्दै निर्माण व्यवसायीको अनुभव र हस्तकलाकर्मीको सीपलाई एकै ठाउँमा ल्याउने अपेक्षा गरिएको बताउनु भयो ।–न्युज एजेन्सी नेपाल